Xilli ciyaareedka cusub ee horyaalka Premier League ayaa bilaabanaya iyadoo aan weli la ogeyn natiijada ka dhalan doonta 115-ka eedeymood ee loo heysto kooxda Manchester City. Waxaa kasoo wareegay ku dhawaad 21 bilood markii guddi madaxbannaan oo ka kooban saddex xubnood ay soo afjareen dhageysiga dacwadan, balse weli waxaa la sugayaa go'aan taariikhi ah oo wax ka beddeli kara kubbadda cagta dalka Ingiriiska. Horyaalka Premier League ayaa si rasmi ah eedeymahan u shaaciyay bishii Febraayo 2023. Tan iyo xilligaas, saddex xilli ciyaareed oo dhammeystiran ayaa la ciyaaray, mid afraadna hadda ayuu bilaabanayaa. Guddiga dacwadda ayaa dhageysiga waday intii u dhaxeysay 16-kii September ilaa 6-dii December 2024, hase yeeshee galka dacwadda ayaa weli furan. Dib u dhaca ayaa gaaray heer suxufiyiinta iyo shaqaalaha kooxuhu ay in ka badan sanad sugayeen in go'aanka lagu dhawaaqo. Bishii Maarso 2025, shabakadda ESPN ayaa werisay in qaar ka mid ah shaqaalaha sare ee City looga digay inay baajiyaan fasaxyadooda maadaama la filayay natiijada, balse 17 bilood kadib, sugitaankii ayaa weli socda. Manchester City ayaa wajaheysa 54 eedeymood oo ku saabsan in aysan gudbin xog maaliyadeed oo sax ah intii u dhaxeysay 2009 ilaa 2018, iyo 14 eedeymood oo la xiriira warbixinnada mushaaraadka ciyaartoyda iyo tababaraha muddadaas. Waxaa intaas dheer shan eedeymood oo khuseeya jebinta shuruucda maaliyadeed ee UEFA, toddobo la xiriira shuruucda faa'iidada iyo joogtaynta horyaalka Premier League (PSR), iyo 35 eedeymood oo ku saabsan in aysan la shaqeyn baaritaannada laga soo bilaabo 2018 ilaa 2023. Kooxda ayaa si adag u beenisay dhammaan eedeymahaas. Intii ay sugayeen go'aankan muddo saddex sano iyo bar ah, Manchester City ayaa sii wadatay dhismaha kooxdeeda, iyadoo 690 milyan oo ginni ku bixisay ciyaartoy cusub, waxayna ku guuleysatay lix koob oo waaweyn oo uu ku jiro tartanka Champions League. Dhanka kale, kooxaha Everton, Nottingham Forest iyo Chelsea ayaa la eedeeyay, dambiyo lagu helay, lana ciqaabay xilli ay City weli sugeyso natiijadeeda. Sidoo kale, kooxaha sida Newcastle United ayaa lagu qasbay inay iibiyaan qaar ka mid ah ciyaartoydooda si ay ugu hoggaansamaan shuruucda maaliyadeed ee ay City ku eedeysan tahay inay jebisay, waxaana tusaale u ah xiddiga Elliot Anderson oo 35 milyan oo ginni ugu biiray Nottingham Forest bishii Luulyo 2024. Dib u dhaca baaritaankan ayaa salka ku haya baaxadda kiiskan, kaas oo khubaradu sheegayaan inuu qaadan karo sanado badan maadaama uu u baahan yahay xisaabin qoto dheer. Kiiskan ayaa markii hore ka dhashay warbixinno uu baahiyay wargeyska Der Spiegel sanadkii 2018-kii, ka dib markii uu helay emailo sir ah oo la sheegay inuu dusiyay jabsadaha reer Portugal ee Rui Pinto. Guddiga ayaa horyaalla in ka badan nus milyan caddeymo dukumiintiyo ah, oo ay ku jiraan emailo iyo diiwaanno maaliyadeed oo u baahan in la darsado. Sidoo kale, xubnaha guddiga ayaan ahayn kuwa ku xaniban kiiskan oo keliya, maadaama ay leeyihiin waajibaadyo kale oo dhanka sharciga ah. Xitaa haddii guddigu ay go'aan gaaraan, natiijada markiiba lama shaacin doono. Warbixinta kama dambeysta ah ayaa waxaa qasab ah inay hubiyaan qareennada Premier League iyo kuwa Manchester City, si loo qariyo xogaha xasaasiga ah ka hor inta aan bannaanka la soo dhigin. Sidoo kale, labada dhinac ayaa haysata muddo 14 maalmood ah oo ay racfaan uga qaadan karaan go'aanka, taas oo ka dhigan in kiiska loo wareejin doono guddi cusub oo ka kooban saddex xubnood si ay mar kale dib ugu eegaan. Dib u dhacan joogtada ah ayaa ka dhigaya in tartanka xilli ciyaareedka cusub ee sida aadka ah looga daawado xarumaha ciyaaraha ee magaalooyinka Muqdisho iyo Hargeysa uu ku bilowdo hubanti la'aan. Ilaa laga soo saarayo go'aan rasmi ah oo xaqiijinaya in kooxda Manchester City dhibco laga jarayo iyo in kale, jadwalka kala sarraynta horyaalka ee la soo bandhigo toddobaad kasta waa mid kumeelgaar ah, taas oo ka dhigan in taageerayaashu ay mar kale daawan doonaan natiijooyin isbeddeli kara dhamaadka bisha May.